尋日細蘇被炒單野，我見到有啲留言：
「邊個細蘇？都無聽過。唔紅嘅」
然後我就諗起有種人就係咁：
自己未聽過嘅人就「唔紅嘅」
自己未聽過嘅事就「呃人嘅」
呢種人以自己為世界中心
當正自己全知賢定潮流教父/母
竟然用自己井底之蛙把尺去量度呢個世界。
我諗起以前睇過一篇文話：
人去到某一個年齡就會開始唔再聽新歌
每次打開音樂app都係會揀番自己年代嘅舊歌。
我信。
每年去到叱咤我都有呢種感覺。
以前一放學就聽電台，新人新歌都跟得好貼
叱咤十大首首都聽過，新人獎三甲都叫得出名。
到依家依然每日聽電台，但聽少咗好多
開音樂app都會揀識唱嘅舊歌嚟播
因為要重新喜歡上一首新歌，重新熟悉一首歌開始覺得太難
我叫唔出BTS任何一個成員，Mirror我淨識姜濤
但我唔會話「BTS？未聽過，唔紅嘅！」
但有一種人愈老愈自負
喺佢眼中叱咤最受歡迎歌手應該係容祖兒陳奕迅
唱歌最好聽永遠都係四大天王哥哥梅姐。
其他新晉歌手我未聽過就係你無本事，唔出名
如果係紅呀，我點會唔識？唔係個個都識即係唔紅啦。
佢哋情願相信呢個時代從未進步、從未改變
長江前浪依然波濤洶湧，
都唔願意去接受自己好撚落伍、脫哂節、見識好少。
李先生因自負引致潮流車禍，令自己由青春期昏迷至今。
Come On James，呢個世界好大，
有好多野你都未聽過
不如幫你打去網上行，問下井底駁唔駁到光纖上網 ;)
幫幫手Follow埋IG：@hkgirlfriend
FB：港女友
Search